اللواء عبدالسلام المحجوب أحد ابرز ابطال اكتوبر
درَّب أشرف مروان وبعت جمعة الشوان وخلاه يضحك على جولدا مائير وشارك في عملية الحفار ولعب أخطر دور سري في حرب أكتوبر وهَرَّب ياسر عرفات قبل ما يموت بلحظات وصاحب رسالة «نشكركم على حسن تعاونكم» واللواء عمر سليمان قال عنه «أسطورة لا مثيل لها»
أسرار لا تعرفها عن بطولات اللواء عبدالسلام المحجوب في المخابرات العامة
👇
أول بطولات اللوا المحجوب كانت "عملية الحفار"
والحكاية ابتدت بعد نكسة 67 لما إسرائيل قررت تسرق خير سيناء واشترت حفار عشان تنقب عن البترول بس رجالتنا قدروا يفجروه وهو واقف في ساحل العاج
والمشرف على العملية كان البطل محمد نسيم أو "نديم قلب الأسد" في مسلسل رأفت الهجان
أما دور اللوا المحجوب فكان تجنيد عملاء أجانب لمتابعة خط سير الحفار اللي اشترته إسرائيل من كندا
وكمان كان مسئول عن شحن المتفجرات لمكان التنفيذ
وقدر "المحجوب" يعمل المهمتين بنجاح ودخل الألغام في شنط وغطاها بمادة تمنع أي أجهزة من كشف اللي جواها
أما أقلام التفجير فكان حاططها في جيب الجاكيت اللي لابسه ومحدش قدر يكشفه
أما العملية الأعظم في تاريخه فكانت تجنيد البطل أحمد الهوان أو جمعة الشوان
واللوا المحجوب هو "الريس زكريا" اللي قدم شخصيته الفنان صلاح قابيل في مسلسل "دموع في عيون وقحة" بطولة الزعيم عادل إمام
والسر ده كشفه جمعه الشوان نفسه
وبعد عرض المسلسل "الشوان" كشف إن "الريس زكريا هو اللوا عبد السلام المحجوب"
وحكى وقال :
لما سبت السويس ورحت اليونان أدور على شغل اتقابلت هناك مع (الريس زكريا) وقالي إنه من دمياط وبيدور على شغل هو كمان ولما الدنيا ضاقت بيا عرضت عليه يشتري ساعتى عشان أجيب بتمنها أكل
وبعدها الموساد حاول يخليني أشتغل معاهم بس رحت قلت للمخابرات المصرية اللي حصل وفجأة وأنا قاعد في المخابرات دخل عليا وعرفت إنه ظابط ورجعلي الساعة اللي اشتراها مني ومن بعدها بقى المسئول عني
وابتدت العملية وقدر جمعة الشوان والريس زكريا يخدعوا المخابرات الإسرائيلية 11 سنة وسرقوا منهم أحدث جهاز تجسس وإرسال في العالم
ومن القاهرة بعت اللواء عبد السلام المحجوب للموساد أشهر رسالة في عالم المخابرات وهي :
"نشكركم على حسن تعاونكم"!
وبعدها جولدا مائير جالها الضغط والسكر وبسببهم 6 من ضباط الموساد موتوا نفسهم
والبطولة التالتة للواء المحجوب مرتبطة ببطل تاني اتقال عنه أكاذيب كتير وهو أشرف مروان
ولما كترت الشائعات إن أشرف مروان عميل إسرائيلي أو في أحسن الظروف عميل مزدوج خرج اللوا المحجوب عن صمته وقال :
"أنا كنت مسئول عن تدريب أشرف مروان لاختراق الموساد ضمن خطة الخداع قبل الحرب وشاركت فى تشغيله مع طاقم عمل، على أعلى مستوى"
وأكد إن أشرف مروان مكنش عميل مزدوج ورفض التشكيك فى ولائه
وحكى الريس زكريا إنه بكى كتير يوم وفاة أشرف مروان في لندن مش بس حزنا على بطل أدى مهمته على أكمل وجه في خداع إسرائيل بتكليف من الرئيس السادات لكن حزنا على راجل اختار الصمت قدام التشويه وتدمير السمعة والاتهامات بالعمالة للموساد قبل وفاته
والألم الرابع اللي اداه اللوا المحجوب لإسرائيل كان في حرب أكتوبر ولعب دور تاريخي في تعطيل إمدادات العدو لعمق جبهات القتال
لكن لحد النهارده المخابرات مكشفتش العملية لاعتبارات أمنية
ومن البطولات المجهولة للبطل إنقاذ الزعيم الفلسطيني ياسر عرفات وتهريبه من الأردن أيام أحداث أيلول الأسود لما حصلت حرب بين الجيش الأردني والفلسطينيين والملك حسين قرر يخلص على "عرفات"
لكن الأمر وصل للواء المحجوب بإنقاذه
واتشكلت خلية عمل تحت إشراف البطل محمد نسيم وقدروا يهربوه من عَمان بمعجزة
ونتيجة تاريخه المشرف فضل يترقى في المخابرات لحد ما وصل لمنصب نائب مدير الجهاز أيام اللوا عمر سليمان ووقتها لعب دور كبير في إنقاذ الرئيس مبارك من الاغتيال في أديس أبابا سنة ٩٥
ولما الرئيس جه يسافر كان صاحب فكرة سفر سيارة مصفحة على طيارة مبارك عشان يستخدمها في تنقلاته
ولولا العربية المصفحة اللي ركبها الريس أول ما نزل يمكن مكنش نجا من الاغتيال بالرصاص
رحم الله اللواء محمد عبدالسلام المحجوب وغفر له.
تعليقات
إرسال تعليق